蘋果新聞-【情況有改善】古明華現脫髮危機 急搵張衞健幫手補救

古明華(古佬)今日以代言人身份,在尖沙嘴出席活動,他透露半年前,太太突然指他的頭頂出現「海景」,有地中海危機,於是他急問過來人張衞健有甚麼方法對付脫髮,「返公司梳頭好尷尬,佢哋問我有冇洗頭,話我好多頭皮,但我話我有洗頭㗎喎,佢哋話未必係乾燥,可能頭皮表面受損,或者係病態,佢哋教我用暖水洗頭;後來我接觸咗一個產品,用咗3個禮拜,情況有改善,自信心返晒嚟。」

既解決脫髮問題兼代言一年,問到酬勞方面,古佬笑說:「我最大目的就係頭髮,呢個係最重要要解決,其他冇所謂啦,但唔收錢又唔好,做代言簽咗約都好,係對雙方嘅保障,我有責任幫手宣傳。」

對於武漢疑爆疫症,張兆輝早前冒險到當地搵人仔,古佬表示如果有人邀他到當地工作,都會照去,他說:「其實都擔心,身體係自己,每個人唔可以保障自己係咪可以抗拒到呢個疫症嘅侵襲,不過呢個環境,我又唔會推工作,會照接,最多自己做足妥善嘅預防工作,我哋經歷過沙士,知道點樣去防,今日嚟活動嘅時候,我都有戴口罩,因為我做緊舞台劇同拍劇,我唔想請假,一病就麻煩,所以大家都要小心啲。」

採訪:黃曉妍
攝影:仇志德
—————————–
半年前,古明華太太突然指他的頭頂出現「海景」。
(蘋果日報)
古明華急問過來人張衞健有甚麼方法對付脫髮。
(蘋果日報)
後來除了拯救了頭髮,還擔任了代言人。
(蘋果日報)